25. juli 2000

UKA 2000/18

 

Aningaasarsianit akileraarutit pillugit Inatsisartut inatsisaata allannguutissaa pillugu Inatsisartut inatsisissaattut siunnersuut nr. xx, xx november 2000-imeersoq.

 

§ 1

Aningaasarsianit akileraarutit pillugit Inatsisartut inatsisaanni nr. 5-imi 19. maj 1979-imeersumi, kingullermik Inatsisartut inatsisaatigut nr. 3-kkut 23. maj 2000-imeersukkut allanngortinneqartumi makku allannguutigitinneqassapput:

1. § 17 b imatut oqaasertaqassaaq:
"§ 17 b. Soraarnerussutisiatigut inuunermullu sillimmasiissutitigut aaqqissuussinernut ingerlaavartumik inuuneq tamaat, toqunikkut unittussanik, pisartagaqarfigineqartartussanut akilersuutit, tamakkununnga ilanngullugit aapparisap imaluunniit inooqatigisap qitornallu soraarnerussutisiassanit pisartagaqartinnissaannut kiisalu innarluutilittut ingerlaavartumik soraarnerussutisiassanut akilersuutit aningaasarsiat akileraaruteqaataasussat naatsorsorneranni ilanngaatigineqarsinnaapput. Taamaattorli piumasarisat makku naammassineqarsimassapput:
1) Aaqqissuussinerit pilersinneqarsimassapput soraarnerussutisiaqalernissamut aningaasaateqarfimmi sillimmasiisarneq pillugu inatsimmi ilaatinneqartumi. Aamma aaqqissuussinerit pilersinneqarsinnaapput selskabimi inuunermut soraarnerussutisiaqalernissamullu sillimmasiisarfimmi ingerlatsinissamut Finanstilsynimit akuerisaasumi,
2) utoqqalineq pissutigalugu soraarnerussutisiani inuuneq naallugu pisartagassanik, naammaataasunillu inuuneq naallugu pisartagassaanngitsunik aningaasartaqartuni, utoqqalineq pissutigalugu soraarnerussutisiat ilaannit inuuneq naallugu pisartagaasunit tunniunneqartut 50 procentiinit amerlanerussanngillat,
3) utoqqalineq pissutigalugu soraarnerussutisiat siusinnerpaamik tunniunneqartalersinnaapput 60-inik ukioqalernermi, taakkuninnga ukiukinnerunissaq Skatterådimit akuerineqarsimanngippat,
4) aapparisamut katissimasamut imaluunniit inooqatigisamut toqukkut qimagaasut, katissimasumut avissimasumut imaluunniit inooqatigisimasamut. Inooqatigisaq tassaavoq inuk aterorlugu taasaq akilersuilernermi toqusup illoqatigisimasaa, imaluunniit inuk toqusup katissimasinnaasaralua imaluunniit pisortatigut nalunaarsukkamik inooqatigisimasaa kingornussassat nalunaarsorneqarfiat toqusup toqunissani qaammatinik pingasunik sioqqullugu pilersissimasaa tunngavigalugu kingornutassaqalersimasoq kingornussisarneq pillugu inatsit naapertorlugu aapparisap katissimasap pinngitsoorani kingornutassarisassaraluata minnerpaamik angeqqataanik, aammalu toqusup toqunissaa sioqqullugu ukiuni marlunni illoqatigisimasaa imaluunniit siusinnerusukkut toqukkut qimaguttumik illoqateqarsimasoq sivikinnerpaamik atasuinnarmik ukiuni marlunni, ineqarfik ineqatigiiffigisaq taamaallaat ineqatigiiffigineqarunnaarsimappat paaqqinniffimmut inissinneqarneq pissutigalugu, tamatumani ilanngullugu utoqqalisut inigisartagaannut nuunneq,
5) aapparisap katissimasap, aapparisap avissimasap imaluunniit inooqatigisap qimataasup soraarnerussutisiat pisartagarisinnaavai sivikinnerpaamik ukiuni qulini,
6) taamaattorli qitornanut toqukkut qimagaasunut, aamma qitornarsianut, soraarnerussutisiarititat pisartagaritinneqassapput sivisunerpaamik qitornaasut 24-nik ukioqalernerat tikillugu, aamma
7) soraarnerussutisiatigut inuunermullu sillimmasiutitigut aaqqissuussinerit danskit soraarnerussutisiaqalernissamut inuunermullu sillimmasiissutitigut danskit selskabiini pilersinneqarsimasut soraarnerussutisiat akileraaruserneqartarnerat pillugu inatsimmi §§ 50 aamma 53 A-mut ilaassanngillat.
Imm. 2. Inuunermut sillimmasiisoqarpat sillimmasiisoq sillimmasersimassaaq sillimmasiutinullu piginnittuussalluni.
Imm. 3. Taamaattorli ingerlaavartumik inuuneq tamaat tunniunneqartartussat ukiumut 6.000 kruunit sinnersimanngippatigit soraarnerussutisiaqartitsinermi aaqqissuussanit, imm. 1-imi taaneqarsimasunit, atorfinitsitaanermullu atasumik pilersinneqarsimasunit, tunniunneqartussat aningaasanngorlugit ataasiaannartumik tunniunneqarsinnaapput.
Imm. 4. Taamaattorli aningaasat soraarnerussutisiaqalernissamut aaqqissuussinernit soraarnerussutisiaqalernissamut aningaasaateqarfinni imaluunniit inuunermut soraarnerussutisiaqalernissamullu selskabini Kalaallit Nunaanni angerlarsimaffeqartuni pilersinneqarsimasut ukiuni tulleriinni marlunni tunniuttagassat nalingi, aammalu atorfeqarnermut tunngatillugu pilersinneqarsimasut, ataasiaannartumik tunniunneqarsinnaapput."

2. § 17 c imatut oqaasertaqassaaq:
"§ 17 c. Soraarnerussutisiaqalernissaq siunertaralugu naafferartumik akilersuilluni sillimmasiutitut akiliutit aningaasarsiat akileraarutaasussat nalunaarsorneranni ilanngaatigineqarsinnaapput aalajangersagaqarpat aningaasat sillimmasiutit sivikinnerpaamik ukiuni qulini amerlaqatigiiaarlugit tunniunneqartassasut aammalu sillimmasersimasoq inuutillugu tunniunneqartut inummut pineqartumut tunniunneqartarpata. Taamaattorli piumasaqaatit makkua naammassineqarsimassapput:
1) Isumaqatigiissut pilersinneqarsimassaaq inuunermut soraarnerussutisiaqalernissamullu sillimmasiisarneq pillugu selskabimi Kalaallit Nunaanni angerlarsimaffeqartumi aammalu inuunermut sillimmasiisarfimmik ingerlatsinissamut Finanstilsynimit akuerineqarsimasumi,
2) Sillimmasersimasup 60-inik ukioqalereernerani isumaqatigiissut taamaallaat pilersinneqarsinnaavoq isumaqatigiissummut taamatut ukioqalerneq sioqqullugu pilersinneqarsimasumut ilassutitut, aammalu isumaqatigiissut siulleq eqqarsaatigalugu piffissanut tunniussivissanut tunngatillugu tunniuttakkat sillimmasiutit amerlassusissaata siusinnerusukkut isumaqaatigiissutaasimasup affaa sinnerlugu amerlassuseqassanatik,
3) sillimmasiutinik pisartoq sillimmasersimassaaq sillimmasiutinillu piginnittuulluni. Sillimmasiutit pilersinneqarsimappata sulisuusup sulisitsisuatalu isumaqatigiissuteqarneratigut akiliutillu sulisitsisup akilertarpagit sulisuusoq sillimmasersimassaaq sillimmasiutinillu piginnittuulluni, aamma
4) Sillimmasersimasup 80-inik ukioqalereernerani piffissamik tunniussivissamik isumaqatigiissutip siulliup ulluanit kingusinnerusumik tunniussisarnissamik isumaqatigiissuteqartoqarsinnaanngilaq. Naafferarlugu tunniussuineq aallartissinnaavoq siusinnerpaamik sillimmasersimasup 60-iliineraniit, ukiukinnerunissaq Skatterådimit akuerineqarsimanngippat. Taammaattorli isumaqatigiissutigineqarsinnaavoq tunniussuineq aallartissinnaasoq sillimmasersimasoq innarluuteqalersimappat 60-illuunniit angunagit toqusimappat.
Imm. 2. Isumaqatigiissummi salliutinneqarsinnaasutuaapput sillimmasersimasup "qaniginerpaasai" sillimmasiutit isumaqatigiissutigineqartarnerat pillugu inatsisip paasineqariaasia, inatsimmi tassani § 105, imm. 5, naapertorlugu, imaluunniit sillimmasersimasup aapparisaa katissimasaa, avissimasaa, inuk aterorlugu taasaq sillimmasersimasup sillimmasernermi nalaani illoqatigisimasaa, sillimmasersimasup inuuneq tamaat kingornussisussai, qitornarsiai imaluunniit qitornarsiat inuuneq tamaat kingornussisussai."

3. § 17 d imatut oqaasertaqassaaq:
"§ 17 d. §§ 17 b aamma c-mi aaqqissuussinerit malillugit akileeqataassutinit akilikkanit ilanngaatit piffissamut akiliiffimmut innersuunneqassapput, aammalu ilanngaatit ukiup ilaani pineqartumi akissarsiat katillugit 15 procentiannit amerlanerussanngillat. Aappariinnut ataatsimoortumik akileraartartunut imaluunniit inooqatigiinnut nalunaarsugaasunut tunngatillugu ilanngaat katillugit akissarsiat 15 procentiannit annerussanngilaq. Namminersorlutik inuussutissarsiummik ingerlatsisunut tunngatillugu naatsorsuinermi tunngaviussaaq pissuseqataanik atorfillip akissarsiaasa missingerferneqarnerat.
Imm. 2. Sulisuusup akissarsiaasa akileraaruteqaataasussat naatsorsorneranni ilaassanngillat aningaasat §§ 17 b aamma c-mi aaqqissuussinernut taaneqartunut sulisitsisup akilersimasai.
Imm. 3. Ukiup akissarsiorfiusup ingerlanerani soraarnerussutisiaqalernissamut aaqqissuussinermut ingerlaavartumik tunniussisartussamut § 17 b, tunngavigalugu imaluunniit naaferartumik sillimmasiivimmut § 17 c, tunngavigalugu akissarsiat katillutik 15 procentiat sinnerlugu akiliisoqarsimappat imm. 1, naapertorlugu Akileraartarnermut Pisortaqarfiup akuerisinnaavaa taanna qaangerlugu akiliutit utertinneqarnissaat immikkut ittunik patsisissaqarsimappat."

4. § 17 d-p kingornanut una ilanngunneqassaaq:
" § 17 e. Aningaasarsianut akileraaruteqaataasussanut ilanngunneqassapput:
1) Soraarnerussutisiaqalernissamut aaqqissuussinermit ingerlaavartumik tunniussisartussamit soraarnerussutisiat § 17 b, imm. 1, kiisalu § 17 b, imm. 3 aamma 4 malillugit aningaasat tunniunneqartartut piginnittumut namminermut, aapparisaanut katissimasaanut inooqatigisaanulluunniit, tamatumani ilanngullugit aapparisaq avissimasaq kiisalu inuuneq naallugu kingornussisussat, qitornarsiat imaluunniit qitornarsianit inuuneq naallugu kingornussisussat,
2) soraarnerussutisiaqalernissaq siunertaralugu naafferartumik sillimmasiutinit tigusartakkat §17 c, tunngavigalugu aaqqissuussinermi atugassarititat naapertorlugit naafferartumik tunniunneqartartut sillimmasersimasumut kiisalu sillimmasersimasup toqoreerneratigut naafferartumik tunniuttakkat, tassa kikkut salliutinneqarnissaat pillugu malittarisassat malillugit tunniunneqartarpata pineqartup aapparisaanut katissimasaasut imaluunniit inooqatigisaanut, tamatumani ilanngullugit aapparisaq avissimasaq imaluunniit inuuneq naallugu kingornussisussat, qitornarsiat imaluunniit qitornarsianut inuuneq naallugu kingornussisussanut, aamma
3) soraarnerussutisiaqalernissamut aaqqissuussinermit ingerlaavartumik tunniussisartumit soraarnerussutisiat § 17 b, imm. 1, kiisalu § 17 b, imm. 3 aamma 4 malillugit tunniuttakkat aammalu soraarnerussutisiaqalernissaq siunertaralugu naafferartumik sillimmasiutinit tunniuttakkat § 17 c, malillugu piginnittup katissimallugu aapparisaanut avissimasaanut averusersimasaanulluunniit tunniunneqarpata najugaqatigiinnermi pigisat agguarneqarnerata kinguneranik.
Imm. 2. Naafferartumik tigusartakkat sillimmasiinermit § 17 c-mi pineqartumit pisut isertitatut akileraaruteqaataasussaapput, tigusartakkat inunnut imm. 1, nr. 2-mi taaneqarsimanngitsunut tunniunneqartaraluarpataluunniit.
Imm. 3. Soraarnerussutisiaqalernissamut aaqqissuussinermit ingerlaavartumik tunniussisartumit maanaannaq unitsinneqartumit soraarnerussutisiaqalernissamut aningaasaateqarfimmi imaluunniit inuunermut soraarnerussutisiaqalernissamullu selskabimi Kalaallit Nunaanni angerlarsimaffeqanngitsumi pilersinneqarsimasumiit tunniuttakkat isertitatut akileraaruserneqassapput, taamaattorli takuuk § 17 f, imm. 5.
Imm. 4. Naafferartumik sillimmasiutinit inuunermut soraarnerussutisiaqalernissamulluunniit selskabimi pilersinneqarsimasumit maanaannarlu unitsinneqarsimasumit Kalaallit Nunaannilu angerlarsimaffeqanngitsumit tunniuttakkat isertitatut akileraaruserneqassapput, taamaattorli takuuk § 17 f, imm. 5".

5. § 17 e-p kingornanut una ilanngunneqassaaq:
" § 17 f. Aningaasarsiat akileraaruteqaataasussat naatsorsorneranni ilanngunneqassanngillat nammineq aamma/imaluunniit sulisitsisup tjenestemandit soraarnerussutisiassaattut aamma Arbejdsmarkedets Tillægspensionimut akiliutaasimasut.
Imm. 2. Ingerlaavartumik tunniuttakkat aaqqissuussinermit imm. 1-imi taaneqartunit pisut aningaarsianut akileraaruteqaataasussanut ilanngunneqassapput.
Imm. 3. Akissarsiat akileraaruteqaataasussat naatsorsorneranni ilanngunneqassanngillat soraarnerussutisiaqalernissamut aaqqissuussinerni danskit aningaaseriiviini assigisaannilu erniatigut isertitat soraarnerussutisiat akileraaruteqaataanissaat pillugu inatsimmi kapitai 1-imut atasut kiisalu Lønmodtagernes Dyrtidsfondimiititat.
Imm. 4. Akissarsiat akileraarusigassat naatsorsorneqarneranni ilanngunneqassanngillat sulisitsisup soraarnerussutisiaqalernissamut aaqqissuussinernut pisortani atorfilinnut tunngatitani akileeqataassutai, taakkua ilusilersorneqarsimappata naafferartumik sillimmasiussatut, soraarnerussutisiaqalernissaq siunertaralugu naafferartumik sipaakkatut, indeks malillugu katersatut, kapitalforsikringitut aamma kapitalpensionitut, aaqqissuussineq pinngitsoorani sulisorisamit malitassaasimappat akileraartussaanerlu sioqqullugu pilersitaasimappat. Aaqqissuussinerli soraarnerussutisiat akileraaruserneqartarnerat pillugu inatsimmi § 50 imaluunniit § 53 a-mut tunngasunngortitaasimappat sulisitsisup akileeqataassutai saneqqunneqarsinnaanngillat.
Imm. 5. Akissarsiat akileraaruteqaataasussat naatsorsorneranni ilanngunneqassanngilaq soraarnerussutisiaqalernissamut aaqqissuussinerit maanaannaq unitsitat nalingat, aaqqissuussinerit soraarnerussutisiat akileraarusersugaanerat pillugu inatsimmi kapiati 1-imut atanngippata."

6. § 17 f-p kingornanut una ilanngunneqassaaq:
"§ 17 g. Akissarsiat akileraarusigassat naatsorsorneqarneranni ilanngunneqassapput inuunermut sillimmasiutinit soraarnerussutisiaqalernissamullu aaqqissuussinernit iluanaarutit § 17 b-mi imaluunniit § 17 c-mi ilaanngitsut. Akissarsianit akileraartussaatitaapput piginnittoq imaluunniit piginnittup toqunerata kingornatigut sillimmasiutinik tigusisinnaatitaasoq. Iluanaarut naatsorsorneqassaaq illuatungaatigut ukiup akissarsiviup naanerani sillimmasiutit nalingat ukiup ingerlanerani tigusimasanik ilallugit illuatungaatigullu ukiup akissarsiviup aallartinnerani sillimmasiutit nalingat ukiup ingerlanerani akiliutaasimasunik ilallugu. Sillimmasiutinit amigartoorutaasut taamaallaat ilanngaatigineqarsinnaapput ukiuni aningaasarsiviusuni tulliuttuni tallimani sillimmasiutit taakkorpiaat iluanaarutitaannit § 21, imm. 1-imi malittarisassat malillugit.
Imm. 2. Inuunermut sillimmasiutinit il.il. ilanngullugit tigusartakkat imm. 1-imut atasut aningaasarsiat akileraaruteqaataasussat naatsorsorneqarneranni ilaatinneqassanngillat tunniuttakkat ingerlaavartut pineqanngippata.
Imm. 3. Taamaattorli imm. 1-imi 2-milu malittarisassat atortuunngillat inuunermut sillimmasiutinut il.il. aatsaat tunniunneqarsinnaappata sillimmasersimasup toqunerani innarluuteqalerneraniluunniit sillimmasersimanerup sivisussusissaanik isumaqatigiissutip naannginnerani, imaassimanngippat qaqugu piffissap naanissaa pillugu isumaqatigiissut sillimmasersimasoq 80-inik ukioqalereersimanngippat isumaqatigiissutip siulliup kingornatigut.
Imm. 4. Aningaasarsiat akileraaruteqaataasussat naatsorsorneqarneranni ilanngunneqassanngillat inuunermut sillimmasiutinit tunniussat, tamatumani ilanngullugit innarluuteqalernermi aningaasanngorlugit tunniussat inuunermut sillimmasiutinit imm. 3-mi pineqartunit pisut aammalu ajutoornermi sillimmatinit pisut.
Imm. 5. Aaamma imm. 1-imi 2-milu malittarisassat atuutinngillat soraarnerussutisiaqalernissaq siunertaralugu naafferartumik sillimmasiutinut naafferartumillu katersanut, indeksforsikringinut, indeksopsparinginut, kapitalforsikringinut kapitalpensioninullu soraarnerussutisiat akileraarusersorneqarnerat pillugu inatsimmi kapitali 1-imi pineqartunut.
Imm. 6. Skatterådip inuunermut sillimmasiutit il.il. imm. 1 aamma 2 malillugit akileraarutissaajunnaarsissinnaavai inuunermut sillimmasiut pilersinneqarsimappat sillimmasiisoq Kalaallit Nunaannni akileraartartussaanngikkallartillugu."

7. § 17 g-p kingornanut una ilanngunneqassaaq:
"§ 17 h. Soraarnerussutisiaqalernissamik isumaqatigiissutip imaluunniit soraarnerussutisiaqalernissamut aningaasaateqarfiit aamma inuunermut soraarnerussutisiaqalernissamullu selskabit Kalaallit Nunaanni najugaqavissut akornanni nuussinerit akiliutitut isertitatulluunniit suliarineqassanngillat nuussinermi pineqarpata:
1) soraarnerussutisiaqarnermut aaqqissuussinerit ingerlaavartumik tunniussisartut akornanni, § 17 b, naapertorlugu.
2) Naafferartumik sillimmasiutit § 17 c, malillugu soraarnerussutisiaqalernissamut aaqqissuussinermut ingerlaavartumik tunniussisartumut tunngasut § 17 b, malillugu imaluunniit
3) naafferartumik sillimmasiummiit taamaaqataanut nuussinerit § 17 c. malillugu.
Imm. 2. Skatterådip akuerisinnaavaa aningaasat nunani allani sillimmasiisarnermut aaqqissuussinerniit nuunneqartut soraarnerussutisiaqalernissaq pillugu aaqqissuussinernut § 17 b imaluunniit § 17 c-mi pineqartunut akiliutitut suliarineqassanngitsut.
Imm. 3. Imm. 1-imit 2-mut malittarisassat atortinneqarnissaannut tunngaviuvoq nuussineq sioqqullugu aningaasat nuutat pillugit isertitanit akileraartussanngortitsisoqarsimassanngitsoq akitsuusiisoqarsimassanngitsorluunnit."

8. § 17 h-p kingornanut una ilanngunneqassaaq:
"§ 17 i. Soraarnerussutisiaqalernissamut aaqqissuussinermit ingerlaavartumik tunniussisartumit aammalu soraarnerussutisiaqalernissamut aningaasaateqarfimmi imaluunniit inuunermut soraarnerussutisiaqalernissamulluunniit selskabimi Kalaallit Nunaanni angerlasimaffeqartumi pilersitaasumi maanaannakkut unitsitat tunniutassat akitsuuserneqassapput 45 procentimik.
Imm. 2. Naafferartumik sillimmasiutit maanaannakkut unitsitaasut tunniunneqartarnerat aammalu inuunermut soraarnerussutisiaqalernissamullu sillimmasiinermut selskabimi Kalaallit Nunaanni angerlarsimaffeqartumi pilersinneqarsimasut akitsuuserneqassapput 45 procentimik.
Imm. 3. Imm. 1 2-lu atorlugit tunniussinernut naligiissitaapput allamut tunniussineq imaluunniit allamut pigisassanngortitsineq qularnaveeqqutissatulluunniit tunniussineq kiisalu iliuutsit il.il. aaqqissuussinerup ilanngaatiginnissinnaanermut piumasaqaatinik naammassinnissinnaajunnaarneranik kinguneqartut, taavalu 45 procentimik akitsuuserneqassapput aningaasat allamut tunniussinerup iliuuseqarnerulluunniit nalaani aaqqissuussinerup atorunnaaarnerani tunniunneqarsinnaagaluartut, immaqa akeqanngitsumik isumaqatigiissutip assigisaataluunniit nalinganut.
Imm. 4. Imm. 1-3-mut malittarisassat atussanngillat pigeqatigiitanik aapparisamut agguaassinermi. Agguaassinerup kingornatigut aapparisaq nammineerluni akileraartartunngussaaq imaluunniit pissarseqataassutiminit akitsuutinut akiliisussanngussaaq, aammalu § 17 c, imm.2-mi malittarisassat malillugit salliutitatut inississinnaalluni.
Imm. 5. Akitsuutinik akiliisussaatitaasup pisussaaffigaa soraarnerussutisiaqalernissamut aningaasaateqarfik imaluunniit inuunermut soraarnerussutisiaqalernissamut sillimmasiinermut selskabi iliuutsit imm. 3-mi taaneqartut pillugit piaartumik ilisimatissallugu."

9. § 17 i-p kingornanut una ilanngunneqassaaq:
"§ 17 j. Soraarnerussutisiaqalernissamut aningaasaateqarfiup imaluunniit inuunermut soraarnerussutisiaqalernissamullu selskabip tunniussisussap § 17 i malillugu akitsuut tigussavaat Akileraartarnermullu Pisortaqarfimmut akilerlugu soraarnerussutisiaqalernissamut aningaasaateqarfiup imaluunniit inuunermut soraarnerussutisiaqalernissamullu sillimmasiinermut selskabip akitsuutinut akiliisussaatitaanermik paasisaqarnerata kingornatigut kingusinnerpaamik qaammatip ataatsip qaangiunnerani.
Imm. 2. Soraarnerussutisiaqalernissamut aningaasaateqarfik imaluunniit inuunermut soraarnerussutisiaqalernissamulluunniit sillimmasiinermut selskabi akitsuummik unitsitsisussaanerminik naammassinninngitsoq, imaluunniit aningaasanik ikippallaanik unitsitsisoq aningaasat amigaataasut akilernissaannut toqqaannartumik landskassimut akisussaasunngussaaq, soraarnerussutisiaqalernissamut aningaasaateqarfiup imaluunniit inuunermut soraarnerussutisiaqalernissamullu sillimmasiinermut selskabip uppernarsarsinnaanngippagu inatsimmi matumani aalajangersakkat qarsupissimanagit. Soraarnerussutisiaqalernissamut aningaasaateqarfik imaluunniit inuunermut soraarnerussutisiaqalernissamullu sillimmasiinermut selskabip aningaasat uninngatitassat landskassimut akilertussanngussavai. Akiligassat akilersinneqarsinnaapput inatsimmi matumani malittarisassat malillugit.
Imm. 3. Akitsuutip Akileraartarnermut Pisortaqarfimmut akilerneqarnissaanut malittarisassat sukumiinerusut Naalakkersuisut aalajangissavaat."

10. § 25 l-p kingornanut una ilanngunneqassaaq:
"§ 25 m. Skatterådip akuerisinnaavaa imm. 2-4-mut malittarisassat atorneqassasut suli inuutilluni suliffeqarfiup ilaataluunniit qitornanut, ernuttanut, qatanngutinut imaluunniit qatanngutit ernutaannut tunniunneqarnissaat, tunniussisoq piginnittunngortorlu Kalaallit Nunaanni tamakkiisumik akileraartussaatitaappata § 1, imm. 1, nr. 1 malillugu. Qitornavissiartaarisimasat qitornarsiallu ilaqutavittut isigineqarput.
Imm. 2. Suliffeqarfiup pigisai nalillit tunniunneqarpata akileraarusigassatut nalingannik annerusumilluunniit nalilerlugit, kisiannili nalinginnaasumik nioqqutigissagaanni nalissaraluannit appasinnerusumik, piginnittunngortoq akissarsiat akileraaruteqaataasussat naatsorsorneranni akileraarutitigut nalikillisaatissanut kiisalu iluanaarutit akileraaruserneqarnerannut aamma tunisinermi ajunaarutit ilanngaatigineqarsinnaanerannut tunngatillugu piginnittoq inissisimassaaq soorlulusooq pigisat nalillit piginnittunngortumit pissarsiarineqarsimasut piginnittuusimasup nalimini akiligaatut akeqartillugit. Tunniussisup akileraarutitigut nalikillisaatigisimasinnaasai piginnittunngortup suliarisimasaatut isigineqassapput. Tunniussisup pigisat nalillit inuuniutiminut iluanaarniarnerminullunniit atatillugu pissarsiarisimappagit iluanaarutit annaasalluunniit pigisat nalillit tuneranni pilersut piginnittuulersumit suliaasut taassuma aningaasarsiaasa akileraaruteqaataasussat naatsorsorneqarnerannut ilanngunneqassapput imaassimappat iluanaarutit annaasalluunniit tunniussisup isertitaasa akileraaruteqaataasussat naatsorsorneqarneranni ilanngunneqartussaasimagaluartut taassuma pineqartut tunisarisimappagit.
Imm. 3. Akileraarutitigut kingornussinermut imm.2, naapertorlugu, taarsiullugu tunniussisup piginnittunngortullu toqqarsinnaavaat suliffeqarfiup allamut tunniunneqarnerani iluanaarutit annaasallu nalunaarsussallugit suliffeqarfiit allamut pigisassanngortitaaneranni malittarisassat nalinginnaasut malillugit, suliffeqarfiup pigisai nalillit nalit imm. 2-mi taaneqartut sinnernagit tunniunneqarsimagaluarpataluunniit.
Imm. 4. Ukiumi pigilernerata siulianiittumi amigartoorutit piginnittuulersup suliffeqarfiup tigunerani iluanaarutinit ilanngaatigisinnaanngilai."

11. § 34 a imatut oqaasertaqassaaq:
"§ 34 a. Inuk § 1 malillugu akileraartussaatitaasoq umiarsuarmi Dansk Internationalt Skibsregisterimi nalunaarsorsimasumi Kalaallit Nunaatalu imartaani angalasuunngitsumi sulinermigut akissarsisimappat akileraarutaanut ilanngaataassapput aningaasat qanoq akissarsiaqarneranut tunngasut.
Imm. 2. Malittarisassamut imm. 1-itimiittumut ilaavortaaq inuk § 1 malillugu akileraartussaatitaasoq umiarsuarmi usinik angallassissummi Dansk Internationalt Skibsregisterimi nalunaarsugaasumi sulinermigut akissarsisimasoq, aammalu Kalaallit Nunaata nunallu allat akornanni aalajangersimasumik usinik angallassinermi inuttaasoq, tamatumani ilanngullugit Danmarki Savalimmiullu.
Imm. 3 . § 1-imi malittarisassamut ilaavortaaq inuk § 1 malillugu akileraartussaatitaasoq umiarsuarmi usinik angallassissummi 1.100 bruttotonnage taannaluunniit qaangerlugu usitussusilimmi Dansk Inernationalt Skibsregisterimi nalunaarsugaasumi aammalu umiarsuarni usinik angallassissutini imm. 2-mi taaneqartuni Kalaallit Nunaanni umiarsualivimmiit umiarsualivimmut usinik aalajangersimasumik angallassinermi inuttaanermigut akissarsiaqartoq kiisalu oliamik assartuutini 450 bruttotonnage taannaluunniit qaangerlugu usitussusilimmi."

12. § 59-p kingornanut una ilanngunneqassaaq:
"§ 59 a. § 17 i malillugu akitsuutinut tunngasut Akileraartarnermut Pisortaqarfiup aalajangiiffigisassavai. Akileraartarnermut Pisortaqarfiup aalajangigai pisortaqarfimmut qulliunerusumut ingerlateqqinneqarsinnaanngillat. Akileraartarnermut Pisortaqarfiup aalajangiineri Grønlands Landsrettimut siullermeertumik suliassatut tunniunneqarsinnaapput pineqartup aalajangiinermik ilisimatinneqarneraniit qaammatit arfinillit qaangiutsinnagit. Immikkut patsisissaqarsimappat Landsdommerip tunniussineq akuerisinnaavaa piffissarititaq qaangerneqarsimagaluarpalluunniit. Unnerluutigineqartussaapput Naalakkersuisut."

13. § 82-imi immikkoortutut nutaatut ilanngunneqassaaq:
Imm. 8. Akitsuutit § 17 i malillugu akilerneqartut nakkassapput landskassimut, kommunimut akileraarfiusumut kommuninullu § 27 malillugu ukiumi akileraarfiusumi akileraarutit procentiat aalajangerneqarsimasoq tunngavigalugu, § 28 malillugu ukiumi akissarsiviusumi 1. januarimi inuttussuseq tunngavigalugu akileraarutit procentissaata nalilerneqarnera aammalu § 28 a malillugu ukiumi akissarsiviusumi akileraarutit procentissaat aalajangerneqarsimasoq tunngavigalugu."

14. § 94 a, imm. 1 imatut oqaasertaqassaaq:
"Inuup sullivimmik ingerlatsinerminut tunngatillugu ernianut akiliissutissanik tigusaqartup imaluunniit erniaqartussanik taarsigassarsisitsisup taarsigassarsianilluunniit ingerlatitseqqittup akileraarutissat amerlassusilerneqarnissaannut atugassatut ukiut tamaasa qinnuvigineqanngikkaluarluni akileraartarnermut pisortat ilisimatissavai erniat tunniunneqartut iluanaarutaasulluunniit annertussusiannik kiisalu ukiumi qaangiuttumi kontomik piginnittunut ataasiakkaanut erniatigut tunniunneqarsimasut akiligassanngorsimasulluunniit amerlassusiat, ernialiinerup ullua kiisalu ukiup qaangiuttup naanerani aningaasat tigumiat akiitsutilluunniit annertussusiat. Paasissutissiinissami piumasaavortaaq kontut il.il. ukiup ingerlanerani atorunnaarsimasut nalunaarutigineqarnissaat."

15. § 97, imm. 1 imatut oqaasertaqassaaq:
"Malittarisassat Naalakkersuisut aalajangersagaat malillugit soraarnerussutisiaqalernis-samut aningaasaateqarfiit, inuunermut soraarnerussutisiaqalernissamullu sillimmasiisarnermut selskabit allallu soraarnerussutisianik imaluunniit inuunermut tunngatillugu sillimmasiutinik ingerlaavartumik tunniussisartut akileraartarnermut qullersaasut ukuninnga ilisimatittassavaat:
1) Akileeqataassutit akiliutillu annertussusiat,
2) Soraarnerussutisiaqalernissamut aaqqissuussinerit § 17 b-mi c-milu taaneqartut tunngavigalugit tunniuttakkat,
3) Ilaasortaajunnaarnermi tunniussat, utertillugu pisiarinninnerup nalingi aaqqissuussinerillu tamakkua malillugit bonusit aamma
4) § 17 e, imm. 5-imi iliuutsit taaneqartut, taakkua soraarnerussutisiaqalernissamut aningaasaateqarfiup, inuunermut soraarnerussutisiaqalernissamullu sillimmasiinermut selskabip il.il. ilisimalersimappagit."

16. § 107, imm. 1 imatut oqaasertaqassaaq:
"Taamatut § 101-imi taaneqartutut pillarneqassaaq kinaluunniit piaaraluni mianersuaalliorujussuarluniluunniit:
1) Akileraarutinik A-nik imaluunniit iluanaarutisianit akileraarutinik unerartitsinissaminik naammassinninngitsoq,
2) piffissaagallartillugu akileraarutinik unerartitanik akiliinngitsoortoq,
3) piffissaagallartillugu § 42, imm. 3-mi aamma § 71-imi taaneqartutut ittunik paasissutissiinngitsoortoq,
4) pissutsit § 42, imm. 3-mi imaluunniit § 71-imi taaneqartut pillugit eqqunngitsumik
imaluunniit paasinerluisitsisinnaasunik paasissutissiisoq,
5) § 17 i, imm. 2 malillugu akitsuutip tigunissaanut pisussaaffimmik sumiginnaaneq, imaluunniit
6) § 17 i, imm. 1 malillugu akitsuummik tigummigallakkamik piffissaagallartillugu akiliinnginneq."

17. § 107, imm. 3 imatut oqaasertaqassaaq:
"Imm. 3. Taamatullu § 101-imi taaneqartutut pillarneqassaaq kinaluunniit:
1) Aningaasarsianik A-nik imminut tunniussisitsisoq nalunngikkaluarlugu peqqussutigineqartutut Akileraarutinik unerartitassanik unerartitsivigineqarsimanngitsunik,
2) piaaraluni mianersuaalliorujussuarluniluunniit § 37, imm. 4 aamma 5, § 40, imm. 6, § 45, §
47, imm. 6 imaluunniit § 48 malillugit aalajangiinermi atugassanik eqqunngitsunik paasinerluisitsisinnaasunilluunniit paasissutissiisoq imaluunniit paasissutissanik qinnuteqaatit aalajangersakkani taakkunani taaneqartut ilaannut atasumik apeqqutip aalajangiiffiginiarnerani pingaaruteqarsinnaasunik nipangiussiinnartoq, imaluunniit
3) § 17 i, imm. 5-mi taaneqartutut nalunaaruteqanngitsoorneq".

 

§ 2

Inatsit atortuulerpoq 1. januar 2001-imi.

Kalaallit Nunaanni Namminersornerullutik Oqartussat, ulloq xx 2000.

Jonathan Motzfeldt

/

Josef Motzfeldt